LA FIDI E LA FESTA poesia di Giovanni Salvo

LA FIDI E LA FESTA poesia di Giovanni Salvo

Appena arriva la Festa di lu Munti
accatti un chilu di cubajta bona
Scinni a la chiazza e prumissa scunti
Unni la banna allegra certu sona

'Nmiezzu a palluna e simenza salata
passiu cuntenti, passanu lestu l'uri
Stanchizza nun sientu, finu a nuttata
ca pi' sta madonna provu veru amuri

Banneri di ciliu di tutti li lati
m'assiettu a rocchia cu li bieddri amici
Lu conti e lu principi e li lucenti spati
ni' stu' paisi mi sientu filici

Passa' ora Liddru cu la mani affirrata
sta picciutteddra, la zita mi pari
Di la Girmania di curtu e' turnata
a la madonna vinniru a truvari

Quantu testi mi truovu davanti 
di la piazzetta a la Matrici
Tra zuccaru filatu e miennuli fumanti
li grazii buoni la beddra Matri fici

Di primu pannieddru sti cavalera
muli cu giumma e jumenta bardata
E lu paisi tuttu ora spera
ca a lampu acchianassiru la scalunata

Vint'unu cuorpi di sturdenti cannuni
avvissanu a tutti, cu parti e cu resta
A la funtana lu tunnu gibbiuni
a lu Munti la fidi e la festa.