Poesia, "Lu Teatru Comunali" di Isabella Martorana Messana

 Di Racarmutu anuri e vantu

è lu nostru Teatru Comunali

ca di uortu di cummentu

addivintà gran monumentu.

A mmità di l'Ottucentu

di lu sinnacu Matrona

e la Giunta Municipali

fu criatu e architettatu

E nni l'anni a biniri

fu pittatu e allisciatu
di lu sinnacu abbucatu
don Jachinu Savatteri

Lu ngigneri di Girgenti

priparà li ncartamenti.

Lu tuluni fu pittatu

cu li Vespri e lu duellu.

Vinni puru di Palermu
lu Pitturi cu lu pinnellu
e nni ficiru un gioellu
nicu sì, ma tantu bellu

comu lu Massimu di Palermu

Lu jardinu cancià vita

un teatru è divintatu

e lu nomu ha pigliatu

di Regina Margherita.

Rigulettu, Opiretti, la Traviata

veni bona apprizzata la cantata.

Di li parca a lu luggiuni e pi tutta la platea
scruscimani a ma finiri ca paria na marea.

Tutt'a na vota canciaru li tiempi!

S'astutaru luci, sona, canti
p'addrumari la machina parlanti
ca cu li so pupi ncantava la genti.

Di l'artista si nni jì lu sciatu

lu cinamu trasì nni lu Teatru!!

Quannu può fu spardatu e cunzumatu

tuttu luordu e scrucchiulatu,
cu lu tuluni ca pinnia strazzatu
lu Teatru fu chiusu e abbannunatu.

Pi ogni cori fu ranni lu piniu!
Pi Nanà' ci fu sulu un disiu:
"Stu Teatru s'hav’ aprìri
comu prima hav'a turnari!"

Anni e anni hannu passatu............

Finarmenti!
Lu Teatru è rinnuvatu!!!!

m pompa magna è riturnatu!

Tuttu a festa lluminatu
vinni un juornu naguratu
di lu nostru Zeliu Ciampi prisidenti

n cumpagnia di donna Franca la muglieri

e di lu nuovu dirigenti
lu scritturi Camilleri.

Chi sirata purtintusa!

Mi ristà nni l'occhi affisu

dru quarttordici frivaru:

lu Teatru beddru lustrusu
lu purtuni ancora chiusu.
lu Paisi tuttu a lu scuru,
alluccutu chi taliava
l'Angilu chi vulava

Matri mia, chi cumpusioni!!

Chi gran fuddra di cristiani
frustera e paisani
junti cca pi st'occasioni.

E ora ca l'aviemmu

gudiemmunillu stu gioellu !
Stu Teatru tantu bellu

tiniemmulu abbunnatu

di cantu, suonu , ballu,

cummedi e varietà,

sempri cchiossà e di bona qualità.

Ca l’arti pani è pi lu spriritu

pi tutti a ogni età!

ISABELLA MARTORANA MESSANA



Il teatro di Racalmuto, lavoro realizzato

da Giovanni Domenico Marchese