A CHI SIRBISSI (la puisia ca nun gracciassi) di Giovanni Salvo

Vulissi scriviri na' bona puisia
Cu dunci rimi e senza eresia
A tutti vulissi dedicari un versu
Fussi, nun fussi un tempu persu

Ca nun gracciassi, senza firiti
Versi abbrazzati, comu du ziti
Parlassi di paci e di granni amuri
Senza vileni e senza duluri

Vulissi truvari paroli appattati
E a nuddru mullari li masciddrati
Cantari a lu munnu sulu sturnelli
Frasi muoddri cuomu ciambelli

Parlassi di suli tra li muntagni
E di aciddruzzi 'ntra li campagni
Ungissi lu cori e lu sentimentu
Scacciassi l'odiu ni' lu parmentu


Siddru putissi purtassi attassu
A cu senza puisia ci cala l'assu
E cu scaltrizza fa turnari li cunti
Senza prigari e ghiri a lu Munti

'Ntrizzassi paroli comu testi d'agliu
E a l'arruganza ci dassi un tagliu
A chi sirbissi truvari sta via?
Si nenti pungi, nun fa certu puisia

(Giovanni Salvo)