SBAMPÁ LA FESTA poesia di Vincenzo Castronovo

photo: Semplicemente Racalmuto

Lu misi di lugliu cu ansia aspittammu
fina la chiazza si va priparannu,
cu lu cori tuttu trimanti
archi e banneri a nnà mintiri anti.

A l'arrisantu di li vintunu,
lu cori e la menti ni scoti ad ognunu,
lu chiaru cielu di fumu s'impesta
e finalmente sbampá la festa.

N'ecu si senti di tammurina
ogni cuorpu i mazzola t'abballa la vina
n'capu un carrettu tiratu di vò
passa la Santa !! la festa e la sò.

Sabatu veni tuttu cumpusu
forsi la squatra e d'un certu carusu
secunnu mia c'è ddru picciuttieddru
l'aiu vistu passiari abbrazzettu a Chiarieddru.

Dopu li sciarri mangiammu e viviemmu
chissu e l'auguriu di lu ciliu ca aviemmu,
tra un piattu di purpu e du stiglioli
si senti l'avvisu di li firrioli.

A la duminica ,di primu matinu,
si senti arriè lu tammurinu
e accumpagnanu li prummisioni
di li grazi avuti cu devozioni.

Tanti carusi aspettanu un annu
pi vidiri lu cavaddru mentri va achhianannu,
misi in fila n'capu un murettu
pi taliari cu é ,ca acchiana chiù lestu.

Tutti curriennu a la baruna
sutta lu suli s'aspetta che l'una
Un ti interessa si lu bottu ti stona
ma la maschiata è bella ca n'tona.

La varca nesci duminica sira,
la beddra matri di antu t'ammira,
chissu purtoppu e l'urtimu juornu
e li bancarelli fannu rituornu.

Forti si senti l'urtimu avvisu
la stanchizza ormai è ni lu nostru visu,
lu sguardu in aria mezz'ura ni resta
pi taliari li firrioli di l'urtima festa.

E n'acchianammu cu lu pinzieri n'testa
ca la simana passa troppu lesta
ca ancora un annu sanu n'arresta
pi diri arriè SBAMPÁ LA FESTA.

(Vincenzo Castronovo)