E SULU RISTASSI
Vulissi, vulassi
sutta lu lustru di la lampara
E lestu natassi
unni l'acqua nun s'affara
Vulissi , cantassi
di li rocchi affacciati a lu mari
E certu pinzassi
unni di susu lu munnu funnu pari
Vulissi, passassi
lu tiempu callu di l'estati
Di latu ittassi
li pinzera, li mali nuttati
Vulissi, mittissi
tra lu pani e l'ova cu li feddri
Lu vinu di li missi
ni' lu bucali di li puvirieddri
Li passi cuntassi
di lu mafiusu a la casa mia
Ca sulu ristassi
l'amaru suspiru di sta puisia.
di Giovanni Salvo
Nessun commento:
Posta un commento